കല്ലറയ്ക്കൽ കുടുംബത്തെക്കുറിച്ച്…..
വി. തോമാശ്ലീഹായിൽ നിന്നും പകർന്നു കിട്ടിയ ക്രൈസ്തവ വിശ്വാസ വാഹകരായ നമ്മുടെ പിതാമഹന്മാർ തൃശൂർ ഭാഗത്തു നിന്നും മീനച്ചിൽ താലൂക്കിലേക്ക് കുടിയേറിയ പുരാതന കുടുംബമായ ബ്രാട്ടിയാനി കുടുംബത്തിന്റെ പിൻമുറക്കാരാണെന്ന് ചരിത്രത്തിൽ കാണുന്നു. പഴയ തെക്കുംകൂർ രാജ്യത്തിലെ മീനച്ചിൽ ഇടപ്രഭുക്കന്മാരായിരുന്ന കർത്താക്കന്മാരുടെ ഭരണകാലം മുതൽ നമ്മുടെ പിതാമഹന്മാർ ഈ പ്രദേശത്ത് വസിച്ചിരുന്നു. പത്താം നൂറ്റാണ്ടിൽ ഭരണങ്ങാനം പള്ളിയുടെ നിർമ്മാണത്തിന് നേതൃത്വം വഹിച്ചത് മീനച്ചിൽ താലൂക്കിലെ ആക്കൽ, ചൂണ്ടയിൽ, ബ്രാട്ടിയാനി, വള്ളിയാംതടം എന്നീ നാലു കുടുംബങ്ങളായിരുന്നു. ഇതിൽ ബ്രാട്ടിയാനി കുടുംബത്തിലെ ആട്ടപ്പാട്ടു ശാഖയിലെ തൊമ്മൻ എന്ന നമ്മുടെ പിതാമഹന്റെ ഭാര്യ ഏലി എറകോന്നി കുടുംബശാഖയായ ഒറ്റപ്ലാക്കൽ കുടുംബാംഗമായിരുന്നു. പാലാ എറകോന്നി – ഒറ്റപ്ലാക്കൽ ശാഖയിലെ തൊമ്മപണിക്കരുടെ മകൻ ഇട്ടിചെറിയത് മീനച്ചിൽ കർത്താവിന്റെ മന്ത്രിയായിരുന്നു. അദ്ദേഹത്തിന്റെ മകൻ തൊമ്മൻ ചങ്ങനാശേരിയിലുള്ള കല്ലറയ്ക്കൽ കൊച്ചീപ്പൻ തരകന്റെ മകളെ വിവാഹം ചെയ്തു. ആ ദമ്പതികളുടെ ഇളയ മകൾ ഏലിയെ ഭരണങ്ങാനം ഇടവക ബ്രാട്ടിയാനി (ആട്ടപ്പാട്ട്) തൊമ്മൻ എന്ന നമ്മുടെ പിതാമഹൻ വിവാഹം ചെയ്തു. വിവാഹ സമ്മാനമായി നാലുമുറി പുരയിടവും ലഭിച്ചു. പ്രസ്തുത വസ്തു ഏലിയുടെ അമ്മയുടെ കുടുംബമായ ചങ്ങനാശ്ശേരി കല്ലറയ്ക്കൽ നൽകിയതിനാലും ആ പുരയിടത്തിൽ ഭവനം നിർമ്മിച്ച് അവർ വസിച്ചതിനാലും ക്രമേണ ആ കുടുംബം ബ്രാട്ടിയാനി ആട്ടപ്പാട്ട് ശാഖയുടെ ഉപശാഖയായി പാലാ കല്ലറയ്ക്കൽ എന്ന് അറിയപ്പെട്ടു. അവർക്ക് യഥാക്രമം മാത്തൻ , ഔസേഫ്, സ്കറിയ, ഇട്ടിയവിര എന്നീ നാല് ആൺമക്കൾ ജനിച്ചു. ഈ നാലു പിതാക്കന്മാരാണ് പാലാ കല്ലറയ്ക്കൽ കുടുംബത്തിലെ നാല് ശാഖകളുടെ ആരംഭം കുറിച്ചവർ. മക്കളും കൊച്ചുമക്കളുമായി എട്ടു മുതൽ പത്തു തലമുറ വരെ അവരുടെ പിൻമുറക്കാർ എത്തി നിൽക്കുന്നു. കല്ലറയ്ക്കൽ എന്ന വീട്ടു പേര് പിൻതുടരുന്ന പാലാ കല്ലറയ്ക്കൽ കുടുംബാംഗങ്ങളുടെ ആദ്യ കാലചരിത്രവും തുടർന്നു വരുന്ന തലമുറകളുടെ വിശദമായ വിവരങ്ങളും ഫോട്ടോകളുമാണ് ഈ ഗ്രന്ഥത്തിൽ ഉൾപ്പെടുത്തിയിരിക്കുന്നത്. രണ്ടാം തലമുറയിലെ മൂത്തപുത്രനായ മത്തായിയുടെയും സന്തതി പരമ്പരകളുടെയും വിവരങ്ങൾ ഭാഗം 1 ലും രണ്ടാമത്തെ പുത്രനായ ഔസേഫിന്റെയും സന്തതിപരമ്പരകളുടെയും വിവരങ്ങൾ ഭാഗം 2 ലും ക്രമീകരിച്ചിട്ടുണ്ട്. മൂന്നാമത്തെ പുത്രനായ സ്കറിയയ്ക്ക് പെൺമക്കൾ മാത്രമുള്ളതിനാൽ ആ ശാഖ കല്ലറയ്ക്കൽ എന്ന വീട്ടുപേര് തുടർന്ന് ഉപയോഗിച്ചില്ല. നാലാമത്തെ പുത്രനായ ഇട്ടിയവിരയുടെയും സന്തതിപരമ്പരകളുടെയും വിവരങ്ങൾ ഭാഗം 3 ലും ചേർത്തിരിക്കുന്നു. പാലാ കിഴതടയൂർ കരയിൽ തൊടുപുഴ റോഡിന്റെ വശങ്ങളിലെ പുരയിടങ്ങളിലാണ് നമ്മുടെ പൂർവ്വികർ വസിച്ചിരുന്നത്. മാത്തൻ, ഔസേഫ്, ഇട്ടിയവിര എന്നിവരുടെ സന്തതി പരമ്പരയിൽപ്പെട്ടവർ പിന്നീട് പയപ്പാർ, കടനാട്, തുടങ്ങനാട് , ചെപ്പുകുളം, ഇളംദേശം എന്നിവിടങ്ങളിലേക്കും ഇടുക്കി ജില്ലയിലെ കുമളി, തേങ്ങാക്കല്ല്, ആനവിലാസം, പെരുവന്താനം, മഞ്ഞപ്പെട്ടി, തോപ്രാംകുടി, പണിക്കൻകുടി തുടങ്ങിയ സ്ഥലങ്ങളിലേക്കും കണ്ണൂർ ജില്ലയിലെ ഉദയഗിരി, കൊട്ടിയൂർ, വയനാട് ജില്ലയിലെ പുൽപള്ളി, കോഴിക്കോട് ജില്ലയിലെ കുറ്റ്യാടി തുടങ്ങിയ സ്ഥലങ്ങളിലേക്കും കൂടുതൽ കൃഷി ഭൂമി ‘തേടി പോയി. അവരുടെ പിൻമുറക്കാർ പിന്നീട് വിദേശങ്ങളിലേക്ക് കുടിയേറുകയുണ്ടായി. ലോകത്തിലെ മിക്കവാറും രാജ്യങ്ങളിലെല്ലാം നമ്മുടെ പ്രാതിനിധ്യം നിലവിലുണ്ട്. അമൂല്യമായ ഈ വിവരങ്ങൾ സ്വന്തം കൈപ്പടയിൽ എഴുതി സൂക്ഷിച്ച് അനന്തര തലമുറയ്ക്ക് കൈമാറിയ ആദരണീയനായ ശ്രീ തോമസ് ഔസേഫ് (പ്രിയങ്കരനായ കൊച്ചീപാപ്പൻ) നെ ഈയവസരത്തിൽ സ്നേഹപൂർവ്വം സ്മരിക്കുന്നു.